اسمحي لي يالغرام العذب يالوجه السمـوح
ان لزمت الصمت أو حتى لبسـت الاقنعـه
اعترف لك ما بقى من عالي الهمـه سفـوح
انحدر كلـي مثـل طفـل تحـدر مدمعـه
من يبي بالله يفتح لي غلق صـدره و ابـوح
ضاقت الدنيا بشاعـر طيـب قلبـه ضيعـه
ما قبلنا الحظ قولي وين ابارحل ويـن اروح
الصبر ياهـو يعـذب و الامانـي موجعـه
اه يا جود الحزن وياي و الفرحـه شحـوح
ضايع بهمومـي الغبـرا بوسـط المعمعـه
اشتكي لوسادتـي دنيـاي واسمعهـا تنـوح
كنها بعضي وبعضي وين هو مـن هومعـه
ايه انا و العالم المغرور و اليـاس اللحـوح
خايض حرب الرياح اللي تسوق الاشرعـه
مختلط في عبرتي حبر الشقى ودم الجروح
ومستوي في نظرتي غرب الوجود و مطلعه
عودي المبري بقى به من عطايا الوقت روح
وفصل خامس حاير بين الفصـول الاربعـه
وراس مالي ذكريات حلم وأمال و طمـوح
لا صديـق ولا رفيـق ولا طريـق واتبعـه
نوب اسافر في سديد الراي ونب في جنوح
مختفي صوت الحقيقه كيف ويش لون اسمعه
سامحيني دام هجري واضح كل الوضـوح
واسمحي لي بالرحيـل بلاتذاكـر وامتعـه




‘‘‘‘‘ نواف بن فيصل ‘‘‘‘‘